Бірнеше кітаптың авторы Сабырбек Олжабайдың есімі әдебиет сүйер қауымға сатиралық шығармаларымен, лирикалық өлеңдерімен танылды. Бүгінде кемел ой тоқтатқан қаламгер ретінде байыпты прозаға қалам тартып жүр. Оның «Жылыбұлақ» атты прозалық кітабын оқырман қауым жылы қабылдады. Жазушының әр шығармасынан қазақы леп еседі. Әңгімелері алған нысандарын жан-жақты аша білуімен құнды. Осы кітапқа енген туындыларынан автордың қара сөздің қаймағын қаламына орай білетін жазбагерлігін тануға болады. Жазушы «Ақсақ Темірдің алмас қылышы» атты повесін тарихи деректер негізінде жазғанымен, өзінше ой түйеді, байлам жасайды, дәуір дүрбелеңдеріне өзіндік көзқарасын білдіреді. Жазушы әлеуметтік өзгерістердің астарына да өзіндік көзқараспен үңіледі. Автордың тілі жеңіл болғанымен, адам құпиясының қалтарыстарын ашудағы шеберлігі оқырмандарын бей-жай қалдырмаса керек. Кітап қалың оқырманға арналған.