Бек Тоғысбайұлы "Таңдамалысының" бірінші томына кезінде қалың оқырманнан, әдебиет сыншыларынан аса жоғары баға алған "От пен күл" романы "Қамауда" деген жаңа атпен жарияланып отыр. Бұл романда өткен ғасырдың жиырмасыншы жылдары төменгі Іле өзені бойындағы Әкімбек бай, оның інісі Көбен Қамау деп аталатын өлкеде кеңес өкіметінің тапсырмасымен жүрген үш чекисті және олардың түтқыны ақ офицерді өлтіруге қалай мәжбүр болғаны, ар-намыс үшін айқас, айдалада атылған Әкімбектің қызы Ғазиза тағдыры, шолақ белсенді Қоразбай әрекеттері, жаңа өмірдің белсенді күрескері Мейірбек, кедейден шыққан жалынды жас Түрсын, т.б. адамдардың қым-қиғаш өмірі шебер бейнеленген. "Той үстінде", "Ақтоты", "Жұбаныш" атты повестерде де өткен ғасыр ортасындағы ауыл адамдарының әрқилы тағдыры тамаша суреттелген. "Құмбел хикаялары" деген жалпы атпен берілген әңгімелерде әр түрлі өмір талқысына түскен адамдардың бейнесі бар. Сүйген жарға адалдық, достық, махаббат сезімдеріне сүйсінесіз.