Бұл кітап - осыдан қырық жыл бұрын Қазақ Мемлекеттік университетіндегі Республикамыз бойынша жалғыз журналистика факультетін тамамдап, өмірге қанат қаққан бір топ ұшқыр қалам иелерінің, белгілі телерадио журналистерінің тағлымды тағдыр жолдары хақында сыр шертетін өмірбаяндық эссе, зерттеу мақалалары мен сұхбаттар жинағы. 1978 жыл түлектері - курстастар бүгін де - сергек. Қаламы мен микрофонын қаруретінде ұстанып, әлеуметтік өткір мәселелерді шынайы, шұғыл ашып көрсетуге тырысады. Қазақ журналистикасындағы аға буынның қолтаңбасынан зерттеу, дерек пен дәйекті салыстыра отырып, зерделі ой түю қағидаларына мән беретіндіктері байқалады. Курстастардың әрқайсысының өмірбаян, еңбек жолдарынан қос ғасырдағы қазақ журналистикасының да өсу сатыларын аңғаруға болады. Жинақтың жас журналистерге, болашақ кәсіп иелеріне, көпшілік оқырман қауымға айтары мол. Кітапты жоғары және орта оқу орындары, мектеп оқушыларына кәсіптік бағдар беретін қосымша оқу құралы ретінде ұсынып отырмыз.