Бұл - жоңғар шапқыншылығына қарсы күресте отыз жыл аттан түспей елін, жерін жаудан қорғаған Бөрібай батыр туралы кітап. Жинаққа есімі ел ұранына айналған даңқты батыр жайлы әр жылдары жазылып, түрлі мерзімді баспасөз беттерінде жарық көрген тарихшы ғалым, өлкетанушы, зерттеуші қаламгерлеріміздің мақалалары сондай-ақ жергілікті ақындардың батыр бабаларына арнаған дастаны мен өлеңдері топтастырылып отыр. Ол еңбектерде кезінде Қаракерей Қабанбайдың бас сардарларының бірі болған батырдың жорық жолдары мен еліне деген қамқорлығы жан-жақты баяндалып, Бөрібай есімінің осы уақытқа дейін айтылмай келу себептері ашылады. Жинақ жас тарихшы ғалымдар мен өлкетанушыларға, жалпы ел мен жер тарихын оқып-білуге құштар қалың оқырман қауымға арналған.