Ақын А. Өтегенов шығармаларының тақырып аясы кең. Басты кредосы - өз оқырманының жүрегіне отансүйгіштік сезімін егу. Еліміз әлі еркіндік алмаған сонау тоталитарлық кеңес заманында-ақ Атырау мен Маңғыстаудың шежіресі мен тарихына терең үңіле білген ол балладаларымен өз оқырмандарын елең еткізген еді. Сонымен бірге тәуелсіздігіміздің Туын жоғары ұстай білуге де өзге жас қаламгерлерді жетеледі. Елбасымыздың саясатын кеңінен насихаттайтын публицистикалар мен көркем топтама өлеңдер жазды.