Қазақта балаларға еншілеп бәсіре атау дәстүрі бар. Бұл дәстүрдің жас ұрпақты тәрбиелеуде орасан зор қызмет атқаратынын аңғаруға болады. Ал ақын-жазушылардың балаларға атайтың бәсіресі өз шығармалары болып табылады. Негізінен «Балдырған» журналының беттерінде соңғы жылдары жарық көрген бұл туындылар, суреттер бүлдіршіндердің тілін ұстартып, ұлттық тәлім-тәрбие беріп, кішкентай оқырмандардың қиялына қанат бітіреді, өзінің танымдық қасиеттерімен олардың ой-өрісін кеңейтеді. Бұл жинақтағы кішкентай оқырмандардың жас ерекшелігін ескеріп іріктелген әңгімелер, өзінің шұрайлы тілімен, тапқыр шешімімен, қызықты оқиғасымен балаларды баурап алады.