Жазушы-тарихшы, халықаралық «Алаш» сыйлығының лауреаты Орынбай Жанайдаровтың бұл кітабы қазақ халқының аса қызғылықты әрі өзіндік ерекшелігі мол тарихи әфсаналарына арналған. Оқырмандар туған жерін жауларынан қорғап, жанкешті ерліктерімен ежелгі Қазақстан жерінің даңқын асырған, тауып айтқан ұтқыр да шешен сөздерімен ғасырлар бойы ел жадында жатталған кемеңгер қазақ хандары мен билерінің, батырлары мен ақындарының өмірінен алынған тағылымды оқиғалармен танысып, ғибрат алатын болады. Кітапқа Күлтегін, Тоныкөк, Майқы би, Бейбарыс сұлтан, Бәйдібек би мен Домалақ ана сияқты қаһарман көсемдер мен данышпандар туралы, Қобыланды, Ақжол, Бөгенбай және Баян сынды батырлар мен Абылай хан туралы, қазақтың үш бәйтерек төбе билері: Төле, Қаз дауысты Қазыбек, Әйтекелер туралы, сондай-ақ халқымыз мақтан ететін басқа да көптеген саңлақ сақара перзенттері жайындағы әфсаналар мен аңыз-әңгімелер енгізілді.