Жазушының шығармалар жинағының кезекті 3-томына оның қазақ оқырмандарының жоғары бағасын алған қазақ театрының негізін қалаушы, ұлттық өнерімізді дүние қауымына мойындатқан ұлы актер Қалибек Куанышбаев туралы деректі хикаяты еніп отыр. Табиғи талантымен көрермендерді тамсандырған, халқы сүйіп «Қаллеки» деп еркелеткен, өзінің қатарластары ұстаз тұтқан актер өмірде де даналық парасатқа ие болған, замандастары оның өздерімен қатар «өмір сүруінің өзі құбылыс» деп бағалаған дара тұлғаның бейнесі деректі хикаятта жан-жақты ашылған. Шығарма тарауларының «Шымылдық ашар», «Дала сахнасы», «Сахна», «Өмір сахнасы», «Шымылдық жабар» деп аталуынан-ақ оның мазмұндық желісі аңғарылады. Мұнда Мұхтар Әуезов, Әміре Қашаубаев, Қажымұқан, Ғабит Мүсірепов, Құрманбек Жандарбеков, Елубай Өмірзақов, Серке Қожамқұлов, Күләш Байсейітова, Шәкен Айманов, Әбікен Хасенов, Жүсіпбек Елебеков, Асқар Тоқпанов сияқты өнер тарландарының сахналық өмірі сабақтастырыла баяндалады. Бұл хикаятты оқу арқылы қазақ өнерінің жарты ғасырлық тарихын ой елегінен өткізуге болады. Сондай-ақ «Шилі өзен қамыс-ай» атты хикаяты ұсынылады.