Мемлекеттік сыйлықтың лауреаты, ақын Темірхан Медетбектің "Көк түріктер сарыны" деп аталатын бұл кітабы екі бөлімнен тұрады: "Көк түріктер сарыны" және "Уақыт-заман ағыны". Кітаптың негізгі бөлімін алып тұрған "Көк түріктер сарынында" ақын ғасырлар қойнауында қалған көне түріктердің ержүрек рухын тірілтумен бірге, сол қуатты сарын арқылы бүгінгі күннің күрделі де қиын құбылыстарын жырлауды басты мақсат еткен. Бұл еңбек өзінің ізденісімен де, жаңашылдығымен де оқырман қауымды елең еткізері кәміл. Бұрыннан етене белгілі жыр үлгілерімен жазылған "Уақыт-заман ағынында" ақын қазіргі қоғам мен адам бойында жүріп жатқан процестерге барынша ден қояды.