Ілияс Жансүгіров (1894-1938) - қазақ әдебиетін қалыптастырушылардың бірі, жазушы, драматург, қазақ поэзиясының ерен жүйрігі, «қазақ поэзиясының Құлагері» атанған әмбебап дарын. Ақын ретінде I. Жансүгіров шығармаларының шоқтықты шыңы – оның поэмалары. Ақын қаламынан туған «Күй», «Күйші», «Құлагер» сияқты он беске жуық көлемді поэмалары қазақ поэзиясының інжу маржаны болып табылады.Ол қазақ әдебиетінде поэма жанрын түр мен мазмұн жағынан анағұрлым байытып, халық рухын асқақтатын сюжеттерге ден қойды. Оның поэзиясында эпикалық серпін мен лирикалық сезім мінсіз тоғысып, ақынның дара қолтаңбасы айғақтап отырады. Ақынның эпикалық шығармаларындағы бейнелеу тілінің байлығы, сонылығы, стиль өрнегі, құйылған сөз тасқыны, адуынды күші Ілияс Жансүгіровті қазақ халқының сүйікті қаламгерлерінің бірегейі етті. Кітап өлең сөзді құрметтеуші жалпы оқырман қауымына арналады.