Қолыңыздағы қасиетті Құран кітабы Қазан басылымына негізделіп дайындалды. Құран оқуды жаңадан бастағандарға жеңіл болу үшін, оқуға қолайлы қарапайым қаріп түрі таңдалды. Бұл кітаптың ерекшелігі – смартфон не планшет арқылы аяттардың арабшасын және олардың қазақша мен орысша аудармасын тыңдауға болады. Сүрелер берілген әрбір беттің шеткі қапталында QR-код орналастырылған. Беттің жоғарысындағы QR-код сол беттегі аяттардың арабша мәтінін оқиды, ортадағысы қазақша аудармасын, ал төмендегісі сол беттегі аяттардың орысша аудармасын оқып береді. Смартфонға немесе планшетке Play Market-тен немесе Apple Store-дан кез келген OR code reader программасын көшіріп алғаннан кейін, өзіңіз қалаған беттегі QR-код-ты танытып, ашылған парақшадан сол беттегі кез келген аяттың арабша мәтінін немесе қазақша мен орысша аудармасын тыңдауға болады. Құран аяттарын тыңдау арқылы оқылуы қиын сөздердің қалай оқылатынын үйрене аласыз, әрі тәжуидіңізді тексере аласыз және Құран оқушымен бірге қайталап отырып қырағатыңызды түзете аласыз. Құран аяттарын оқыған Махмуд Халил әл-Хусари 1335 жылы зул-хижжа айында, яғни 1917 жылы 17 қыркүйекте Египеттегі Шибра ән-Нәмла ауылында дүниеге келген. Сегіз жасында Құранды бастан-аяқ жаттап алып, қари атанған. Құранның он қырағатын меңгерген әйгілі хафыз. Ол халық арасында Құранды анық әрі түсінікті етіп оқитындығымен танылған. Оның қоңыр дауысы, дыбысты анық айтуы және Құранды түсінікті етіп оқу мәнері Құран оқуды жаңадан бастағандарға үлкен көмегін тигізеді. Махмуд Халил әл-Хусари - Хафс риуаят еткен Асым қырағаты бойынша Құран аяттарын толығымен үнтаспаға жазып шыққан ең алғашқы қарилардың бірі. Аяттардың қазақша және орысша аудармасы «Құран кәрім. Қазақша түсіндірмелі аударма» (аударғандар: Асқар Әкімханов, Нұрлан Анарбаев. – Алматы. 624 бет) кітабынан алынды. Жалпы көпшілік қауымға арналған.