Еңбекте Батыс әлемінің Исламға, мұсылмандар дүниесіне қатысты жүргізген сан қилы зерттеулерінің басын біріктірген сала – ориентализмнің пайда болу себептері мен тарихи динамикасы сипатталып, осы сала аясында қалыптасқан мектептердің өзара үндестігімен қатар өзгешеліктері айқындалады. Ориенталистердің Құранның бастауына, тарихына, Ислам әлеміндегі Құранды зерделеу мақсатында қалыптасқан ілімдер жүйесіне қатысты пікірлері, ой-тұжырымдары сараланады. Ориенталистер тарапынан жасалған Құран аудармалары тілдік тиістілігі бойынша топтастырылып, әрбір аударманың ұтымды тұстары мен кемшіліктері талданады. Кітап дінтанушы, исламтанушы студенттер мен мамандарға, дін ілімдеріне қызғушылық танытатын жалпы оқырман қауымға арналады.