Қазақ халқы үшін көмейін мұнар басқан көне ғасырлардан бері Сөз - әрі семсер, әрі қалқан болып келеді. Бұл ата дәстүр берісі - орта ғасыр, онан бергі - өркенді замандарда ежелгіден де күшейіп, Семсер Сөз - Ел қорғанына айналған. Ғаділет қуатымен қалың қазақтың тарих көшін дүрк бастап, күрт тоқтатып, хақ шешіммен шарт кесіп, ширықтыра бастап әкететін Сөз құдіреті ХХ ғасырдың басында кеңес өкіметінің қанды қақпасын келіп қаққан болатын. Көмейінен алтын суырылып тұрған Сөз сертіне бұл қақпа тарлауыт тартты. Әйтсе де, қазақтың семсер Сөзі ендігі жаңа тарих көшін бастап кетпесе де - оған ілесті. Ұлттық дүниетаным мен сөз мәнеріне жаңаша екпін берген ұлағатты қаламгерлер тарих сахнасына шықты. Қазақ тілінің қазыналы қойнауын терең байытқан сондай Сөз сүлейлерінің бірі - Қазақстанның халық жазушысы, көрнекті ақын Мұзафар Әлімбаев. Мұзағаңның бұл "Нақылнама" кітабы - оның соңғы жетпіс жылға жуық өзі тез арада шығарып тиянақтаған, ұшан-теңіз нақылдарының алғашқы бір ғана бөлегі.