Шапырашты Қазыбек бек Тауасарұлы - XVIII-ғасырда өмір сүрген, артындағы ұрпаққа қара сөзбен, өлеңмен үлкен мұра жазып қалдырған адам.Соның бірі - «Түп-тұқыйаннан өзіме шейін» атты кітәбі. Қазыбек бек -жас кезінен досы Мүйізді Өтеген батырмен бірге Бұқара, Самарқант, Шам, Бағдат, Ыстамбұл, Рим қалаларында болып, оқып, әдебиет, тарих, астрология, музыка, кескіндеу салаларынан көп білім алған жан. Оған қоса «Ақтабан шұбырынды» кезінде елі үшін ұрыста қалмақ батырларына қарсы қасқайып жекпе-жекке шығып, әйгілі Аңырақай соғысында ұлы жүз қолына бас болып, дұшпанды жер жастандырған батыр да. Әсіресе бұл кітап - қазақтың жоңғар шапқыншылығынан өз жерін қалай азат еткенін баяндау жөнінен әзірге еш теңдесі жоқ, бірден-бір сол заманның сырын ашатын дара туынды. Себебі ол «Ақтабан шұбырынды» зобалаңының басынан аяғына дейін қатысқан және сондағы бастан кешкені мен көрген-білгенін естелік етіг хатқа түсірген бірден-бір тұлға.