Ұлы дала ертегілерінің кейіпкерлері жердегі қыбырлаған құмырсқалардан бастап, көктегі жарқыраған жұлдыздарға дейінгі барша тіршілік иелерін қамтиды. Бір атап өтерлігі: өмірдің сан алуан саласын арқау еткен ауыз әдебиеттің туындылары арасында дамыған көркем әдебиеттің әңгіме, хикаят, поэма сынды жанрлары деңгейіне жеткендері де аз емес. Көп жұрт ертегі сонау бір өткен шақта бұлдырап қалды деп ойлайды. Негізінде, солай. Тек бұл қазақ ертегілеріне тән құбылыс дей алмаймыз. Таңданарлығы сол, ерте, ерте, ертеде ауызша айтылып, елге тараған дүниелердің он-сан кейіпкерлері бүгінгі күнде бізбен қатар өмір сүруде. Астанамыздың көркіне айналған Бәйтеректі алып қараңыз. Бәйтерек те, самұрық құс та ғасырлар тереңінен жетті емес пе? Қиял-ғажайыптан бүгінгі өмір болмысына айналған мұндай мысалдар көптеп саналады. Ұлттық ертегілеріміздің кейіпкерлері көбіне-көп ұл-қыздар болып келеді. Мұнда да үлкен мән бар, әрине. Бұл ертегілердің тәлім-тәрбиелік мұрат-мақсатын көрсетеді.