Халқымызда «Ізденген - жетер мұратқа» деген дана сөз бар, яғни әр нәрсені білуге талпынып, білімнің тереңіне бойлау - адамды кемелдікке жеткізеді, рухани байытады. Дүниеде балалар түсіне бермейтін жайттар көп-ақ. Өмірді жете танығысы,бәрін білгісі келетін олар «Ол кім?», «Бұл не?», «Неліктен?», «Қайда?», «Қашан?» деген тәрізді сұрақтарға жауап іздеп, бір тыным таппайды. Олардың осылайша ізденіс танытуы - табиғи заңдылық. Осы орайда, балаларға бағыт-бағдар сілтейтін түрлі танымдық әдебиеттердің көмегі аса зор екендігін ескере келе, кішкентай оқырмандардың білуге деген құштарлығын арттыру үшін «Аруна» баспасы «Балаларға арналған танымдық энциклопедия» топтамасын ұсынып отыр. Сан алуан тақырыпты қамтитын энциклопедиялар балалардың жан-жақты кемелденіп, білімін тереңдете түсуіне, өзі өмір сүріп отырған ортаның қыр-сырын тануға, алыс-алыс өлкелерге қиялында саяхаттауға көп көмегін тигізеді деп сенеміз.