Жазушы Базархан Жақыбаевтың бұл еңбегіне ХХ ғасырдың Жаркент өңірінде орын алған тарихи оқиғалар, алмағайып заман жайлы туындылары өзек болған. Халық зұлмат жылдары жан сауғалап, шегара асып кетсе де, жат жерде өзінің қазақтық болмысын сақтап, ар-намысына қылау түсірмейді. 1955-1962 жылдары елге қайта оралғанда ұлтымыздың ежелгі салт-дәстүрлерін қаймағы бұзылмаған күйде жеткізеді. Ғасырлардан-ғасырларға жалғасып келе жатқан қазақ әйелдерінің ерлігі, биік парасат-пайымы роман кейіпкері Мәрияның басынан өткен қилы тағдыры арқылы өріліп отырады. Шығарма Мәңгілік еліміздің тарихын түгендеу жолындағы рухани жаңғыру идеясы аясында жарық көріп отыр.